九月．雨．淚 月頭：
很難捱...幸而有位找我攝時的朋友往往選對了時間打來 
感謝你...不然...我一定又是那個樣子...雖然...和你通電時，我也忍不住... 月中：
有人說：「若果我中了六合彩，那一定意味著我耗資了將來的運氣！所以那一定不是一件幸運的事，而是悲劇的開始。」
哈...聽了這話不久，我便體現了當中的真義... 事件一
八號烈風前夕，沒帶傘的我，回家時遇上了大雨。
眼看只要一口氣跑完那條斜路便可直達大廈門口，
那管得全身將會濕去大半！總好過站在商場裏飢腸轆轆地等雨停 
當我打算起步既時候，有人拍拍我膊頭道：「我遮埋你丫」
我望一望位男仔，然後答：「唔駛喇...」
原因有二：1.佢係男性 2.中六個年我拒絕俾MSN佢
點知佢跑上前再講多次個句話 
事關佢住我樓下，所以我地就一齊行條斜路喇...
見佢濕左半個膊頭，其實我真係好唔好意思...講左好多句唔該... 事件二
借左同學仔書，本本都好似磚咁...
我一手托住兩舊磚，另一隻手回緊SMS，完全冇手去緊握扶手
點知？就係呢個時候地鐵急停！本來唔會行行下停！
個下失哂平衡！但又係好似做戲咁！
企我對面個位學生哥居然一手捉住我隻手！好大力咁扯我 
雖然事後我地兩個都尷尷尬尬...但係如果唔係佢...我稔我一定跌...仲樣衰...  不過...如果你命中注定係要跌，你始終都要跌！ 事件三
數天後，我要還番兩舊磚俾同學仔，都係要手拎，
因為書包入面都有舊磚，今次唔係SMS，轉左拎長遮。
點知出車廂個時，有個肥佬搶先入車廂，撞到我...
我知...你地一定話：「我咁肥，點會有事！」
可惜，呢位肥佬既衝力太大，我失平衡坐低左係車廂入面... 
救命呀！瘀到爆炸！地下有兩舊磚同把遮...
個死肥佬仲冇講對唔住同扶我起身...唉...個下真係想搵窿"捐"
(係電視劇集，呢個時候應該有型男救我...點解唔跟劇本...) 事件四
去露營，玩得好開心！
有野豬，有雷電警告，有直昇機...仲有個「男人」
個３日２夜，我應該咁形容自己：
煮飯、洗碗係女性；行山、紥營係男性。
雖然而家稔番起我會笑到顛左，但係當時我真係嬲「男人」
唔識又要扮識，識做又懶去做，大隻講，成日計住Ｄ錢... 
做男人又唔夠班，女人又唔輪到佢...(嘩！我好絕  )
不過我唔係憎佢呀，係想話俾佢知應該要識做Ｄ... 一樣米，養百樣人 月尾：
番左中學。
俾你地話：「又黑又肥，對手仲"鞋"哂，同以前冇得比，貶值！」  
哈哈！你地真係好好笑！我一Ｄ都唔介意你地咁講，但介意你地問點入副學士！
點解要問？我唔要你地讀副學士！所以一個都唔可以問！唔可以入！
你地笑我絕，搞到你地連書都冇得讀... 睇《逆水》，感動落淚，因為暑假裏頭都發生左一件事關指甲鉗，
當時我真係一路剪指甲一路流眼淚...我個人想太多了 翌日，陪媽媽送月餅俾舅父。
母親，從前你背著年僅一歲的弟弟，抱著差不多五歲，而又熟睡的妹妹
你大聲叫著六歲、那個背著個大背囊，為了跟貼你而喘氣的我，要再跟貼多一點
沒太多人能相信這位三頭六臀的你，但我是看著這光景大的，怎能棄信？
事過境遷，地鐵路線已由當初３條，擴展至１０條了...
今天，當我倆拖著手笑說地衝入車廂...大概，我是紅著眼的吧...
正是因那刻，我感到你是用氣力的想緊跟貼我...
怎可以...我進步了，但你卻不由自主地退步了？... 還有，從前到舅父那兒，他總會拉我去踏單車的...
但現在，你都拿不了精力來了...
在我「追求」學業的那些年頭，發生太多事了...
可是...那些年...我真是認真的追趕著學業麼？ 道別的一刻...我真的有衝動攬攬舅父你呢...  ***** 九月，盡是聽周柏豪的歌 
《 宏願 》《報告總司令》《夠鐘》《想太多》《一拖再拖》《陳某》《同天空》《一事無成 》
無限個㊣ | 
